朋友 我當你1秒朋友
朋友 我當你1世朋友
每次聽呢首歌，我都會諗起我小1至小3既同班同學兼果時最好既朋友張家瑛。
講真，我小學3年級之前既同學仔，我淨係記得佢。
其實我都唔知點解會同佢咁friend，可能因為我地3年都同班，又差不多兩年都坐埋一齊。
果陣時我地上堂都唔聽書既，兩個淨係掛住0係功課簿上面畫公仔，hello kitty la、keropi la、mickey mouse la、春麗la……我覺得佢畫春麗好靚ga，佢又覺得我畫keropi靚0的咁。不過，每當老師行到埋黎，佢都收埋本簿收得快過我，搞到淨係得我次次都因為俾老師發現左我畫公仔而沒收左我本簿。但係唔知點解，我又會唔驚咁，拿過另1本簿出黎叫返佢同我一齊繼續畫，然後繼續俾人沒收，然後繼續畫。
彷彿畫公仔就成為左我地一0係埋一齊就1定會做，同埋最鍾意做，做得最開心既事。
去到小3既下學期，班主任掉位，我地唔再坐埋一齊，果陣時我諗，咁以後咪冇得1齊畫公仔lor？！因為咁，我0係全班既同學面前喊得聲嘶力竭，呢次我諗係我第1次為左佢而喊。不過，班主任冇因為我喊而動容，仲掉左我坐單丁位。
落左堂之後，張家瑛嘻皮笑臉咁走過黎同我講︰「wa! 原來妳真係話喊就喊ga bor！不如我地1陣去搵下副班主任丫，佢好人0的，妳再0係佢面前喊，或者佢會肯俾返我地坐埋一齊呢~ 哈哈~」
果陣時我好嬲佢用我為佢流既眼淚講笑，亦都嬲佢同左第2個坐之後仍然可以好開心咁同新鄰居上堂果時1齊畫公仔。原來我0係佢心目中既位置係任何人都可以代替。
我自己1個坐左單丁位之後，我上堂冇再畫公仔，亦都冇再同佢1齊畫公仔。
後來，父母要我去讀1間好0的既小學，幫我報左轉校，我知道我可能再冇同佢1齊玩既機會，於是我又走去同佢和好如初。
仲0係佢果年既生日，我去左佢生日會，仲買左個當年好hit既美人魚barbie俾佢。呢份應該係我當年第1份買得最貴重既生日禮物，其他同學仔生日我都係送下鉛筆ah擦膠ah咁ga ja。
「記住保持聯絡ah！」
我仲好記得佢當時講呢句說話既聲調同語氣。
不知你是我敵友 已沒法望透
被推著走 跟著生活流
跟住果年既聖誕，佢寄左張聖誕卡俾我，我又寫返幾行字俾佢之後，佢就冇再回信la，我都冇再寫信la。
再之後既1年，我同佢都冇再寄咩聖誕卡ah復活節卡ah咁。可能係因為我0係新學校識左好多好朋友，好多比佢好既朋友—佢地唔會由得我俾老師罰唔理我，佢地唔會拿我既眼淚開玩笑，佢地唔會輕易搵其他人取替我既位置。
後來我先至發覺，原來我潛意識裡面仍然係耿耿於懷。
來年陌生的是昨日最親的某某
之後，我搬左兩次屋，我都冇寫信話返我個新地址俾佢聽；然後我亦都0係其中1次搬屋，整唔見左我小學果本紀念冊，我同佢既連繫就係咁1下子冇哂。我既生命冇再出現過「張家瑛」呢個人。
或者而家就算我係街上有幸同佢擦身而過，我諗我都唔會知係佢。我連佢個樣都唔記得la，淨係記得佢畫公仔果隻手既手背上面有1塊深紅色既胎記。
如果唔係呢首歌，我諗我唔會再諗返起佢，都唔會再因為佢而喊。
都話人與人既network係好微妙，好似蜘蛛網咁，可以好容易交織起黎，越來越大，遍佈每1個角落；但係亦都好易俾風吹1吹，又斷咁幾條。
我諗，我以後都唔會咁輕易放棄1段關係。
睇到呢度既你，相信你1定睇左好耐，如果你唔係當我係friend，我諗你1定唔會花時間睇咁耐。所以，我都唔會咁輕易放棄你。
朋友 我當你1秒朋友
朋友 我當你1世朋友
歌詞
No comments:
Post a Comment