Monday, August 29, 2016

我們的Banner




我每晚行返屋企,都會經過一幅好大嘅鐵絲網牆,佢其實係今屆立法會選舉嘅banner位黎架,掛滿左新東所有候選人嘅banner。我每次經過果條路都覺得好危險,因為佢地張張banner啲索帶都索得好核突,啲頭頭尾尾飛哂出黎,𠝹到啲途人萬劫不復咁。

但係,唯獨是4號陳云根張banner啲索帶係剪哂頭尾架!!!梗係啦,係我地熱血公民嘅手足掛架嘛!!!我每次經過都會比我地手足嘅細心感動到

然後我再望下其他banner上面嘅標語—什麼「誠意」、什麼「拼搏」、什麼「務實」⋯⋯我就覺得好諷刺。你地啲人連張banner都掛得核核突突呀!我點可以信你地係「誠意拼搏務實」呀!「誠意拼搏務實」唔係自己話自己就係架白痴仔!!!


再望下4號陳云根嘅banner,我地冇自己讚自己,上面只係寫左5隻字—「永續基本法」。其實我地熱普城團隊所有海報banner上面都只係得呢5隻字,因為呢5隻字就係我地入左立法會之後要做嘅野。只要你選左我地入去,我地就會啟動五區公投全民制憲,修改基本法第5條,永續基本法,確立香港實然主權。只要確立左實然主權,就可以將基本法改做適合香港嘅憲法了,取回單程證審批權、普選行政長官等都指日可待了

我地嘅banner就係正正話比你聽我地會做嘅野,而唔係好似其他候選人咁只有務虛嘅言詞

而我每次經過呢條banner路都會暗暗希望會有路人同我一樣咁欣賞呢張banner,然後信任我地,投票比我地,就好了

#新東4號陳云根
#新西5號鄭松泰
#港島7號鄭錦滿
#九西7號黃毓民
#九東10號黃洋達

義之所在,心之所往



早幾日同事同我傾開奧運閉幕,我先發覺原來我自2008年北京奧運之後就冇睇過奧運⋯⋯因為上屆同今屆都係忙於立法會選戰⋯⋯等五區公投都成功埋之後,下屆2020可以去東京睇奧運喇卦⋯⋯

呢4年黎好多朋友都問過我加入熱血公民係受薪定做義工架。首先,熱血公民哪有錢你老母,呢啲咁窮嘅組織點會請得起我呀?但我又唔會話我係做義工喎。加入熱血公民唔係咩幫人嘅課外活動黎架,好辛苦架好多野做架,一個唔覺意又會比人恐嚇呀比人拉呀,邊有做義工咁危險架。但係熱血公民每一個成員都會搏盡咁去做佢地嘅崗位,因為我地真係一班熱血嘅公民黎架!我地做咁多野係為左自己架!為左香港架!為左我地嘅安心立命之所架!

香港有好多人好醒,好識計算,為左霸佔眼前嘅利益而不惜犧牲他人;又有好多人好蠢,誤解政治,你幫緊佢但佢又以為你搵佢笨⋯⋯雖然呢啲人係好應該冚家產的,但熱血公民真首領陳秀慧提醒過我地,我地應該心存慈悲,我地爭取嘅,除左益自己,仲會益埋佢地架。我地唔介意。

義之所在,心之所往,就要去做,就係熱血公民

「義之所在,心之所往,就要去做」呢句野其實喺國師陳雲嘅《香港城邦論2之光復香港》第46頁出現過架!我係咪好熟書呀!梗係啦我啱啱先睇完⋯⋯



今屆選舉我主要幫新界東4號候選人陳云根助選,冇錯佢就係我地尊稱嘅國師喇。我諗我第一次認識國師嘅厲害就係我2012年買左《香港城邦論》黎睇。其實我嘅政治啟蒙書係黃洋達嘅《金錢師》,我係因為睇左《金錢師》而加入熱血公民架!哈哈哈哈!諗起都覺得低能。但《香港城邦論》真係勁到爆炸架!佢寫得好顯淺易明,但係講緊啲好勁嘅野喎

即係以前啲泛民成日話要中國有民主香港先可以有民主,搞到我捐左咁多錢比支聯會買蠟燭,但《香港城邦論》Chapter One就話你聽,如果中國有民主先過香港,香港就仆街啦,你諗下中國13億人嘅民智同「如果不是我們,你們就完蛋了」嘅氣焰,如果佢地有一人一票,鏟平香港都得呀。我睇到呢度,簡直係當頭棒喝。係喎,點解啲咁易明嘅野,我地會比泛民厄左幾廿年

仲有好多架,佢仲有講香港其實不嬲都有實然主權,香港人根本唔洗買中共怕,因為係中共冇左香港唔得!嘩,你諗下,呢啲咁勁嘅野,係出現喺2011年出版嘅《香港城邦論》喎!5年前喎!陳雲簡直係本土思潮之父呀!

所以我成日推介《香港城邦論》比朋友架,又淺又易明,但勁!

國師個人都係一樣啦,佢啲演講都係簡單易聽,語氣溫和,但係內容都係好有力量,勁到核爆!

佢就係我今屆助選嘅候選人喇,你地新東選民個個都要同我投票比佢!!!

當然,為左完成我地五區公投全民制憲嘅偉業,你地其他區嘅都要投哂比我地熱普城嘅候選人!!!

學台長梁錦祥話齋,今次選舉熱普城五區當選唔係終點,而係香港建國嘅起點!!!

又原來國師連鐵山靠都識,我下次見到佢要問下佢識唔識猛虎硬爬山先得

Monday, August 22, 2016

城寨英雄 19


前日果集三姨婆叫拳佬去同刁蘭訓,拳佬好怕醜咁話︰「我仲係男仔黎架」嘩真係好嘔心。一個40歲嘅大男人先黎拍呢啲小子成長戲。點解煎pan要而家先懷才得遇。算了,因為佢靚仔我原諒左佢

跟住朋友話但如果搵真後生仔拍又會唔好睇,咁佢又啱

煎pan扮羞澀個樣真係好萌

然後我無啦啦download左煎pan個fan club個app做左「好鵬友」。日日睇佢啲相。真係好痴線。

Thursday, August 18, 2016

緣份已經無意中開了路



佢有句歌詞係「太多傷心感嘆號」!!!咩傷心感嘆號呀!!!咩年代黎架!!!好娘呀呢個term。我次次聽到都會笑左。

好啦其實我覺得呢套劇幾好睇呀。好膠咁。但係集集都有人要救有壞人要打,有世仇後代嘅愛情,有正直青年愛上殺手,主角係傻仔小子成長橋,成套劇都係經典套路黎架!!!我好鍾意呢啲ON9野的!!!

然後你完全係會估到同鄉會三巨頭最好打果個一定係從來都冇出過手嘅柯萬長。而柯萬長後面一定又有一個終極boss咁架嘛。哎呀我真係好鍾意呢啲估到哂嘅戲呀!

然後我已經follow左煎pan個ig哈哈。日日J咁。


#緣份已經無意中開了路
#其實我覺得刁蘭好煩佢幾時死呀

而家我晚晚睇呢套劇,搞到我啲《真田丸》停滯不前。