Sunday, May 31, 2015

破除世人對俄羅斯嘅誤解

1.俄羅斯啖好食
俄羅斯傳統食物嘅口味係比較特別嘅,佢地會飲酸MAY MAY有汽嘅凍湯,主食係布林餅 (類似PANCAKE,餡可配肉、魚、菜、朱古力、魚子……)同餃子(係!就係我地食開果隻餃子,不過要點SOUR CREAM),連食魚生壽司都係配沙律醬……聽落好似好奇怪,但係食落係OK好味的!有一餐我地食左個「大籠包」,我地叫佢「大籠包」因為佢係小籠包咁嘅樣但係手掌咁大隻!咬開個皮可以飲哂啲肉汁的!超好味!小籠包愛好者必食!!!所以其實俄餐都有好食嘅!不過如果你真係接受唔到,其實周街都係西式餐廳CAFÉ,可以食返普通西餐的。老麥KFC BURGER KING都梗有一間係左近。中餐泰餐都有,少啲囉,不過點都唔會去到食唔慣俄餐就會餓死嘅地步。

2.俄羅斯溝通唔到
俄羅斯人主要講俄文,唔講英文,周街啲標示都係俄文冇英文,地鐵廣播都只得俄文﹐BUT!其實俄文睇睇下都睇得明的。去左幾日我已自覺識睇大部份,唔洗TURING整部CHRISTOPHER比我解碼,好簡單。譬如кофе = coffee; туалет = toilet; метро = metro……拿!係咪好簡單先!咁你去旅行不外乎都係飲下咖啡去下廁所搭下地鐵架啫,再深啲嘅都唔洗學啦!況且其實服務行業大部份人見你唔識俄文都會同你講返英文,最多講得唔係幾好嘅啫,不過係溝通到嘅;而且好多餐廳都有英文MENU。再唔係,呢個世界仲有看圖識字同身體語言架嘛!所以其實就算唔識俄文,生活都完全唔困難架!

3.俄羅斯好破舊
可能我們去開市中心同遊客區啦,我覺得周圍都好光鮮亮麗喎!乾淨過香港同西歐好多地方!條街一日洗幾次,街同河都冇垃圾!可能少蝗啦,一路上見到嘅都係歐美旅客,好少亞洲或中國旅客!大家都好注重衛生!好開心!

4.俄羅斯人冷漠無情
服務業果啲唔講啦,佢地對你NICE係職責所在,我講緊街邊路人,其實好多都好NICE喎,我地問路呀有咩困難呀,佢地都係有求必應,就算唔識講英文都好努力幫我地喎!有次我地去超市買水,唔識分邊啲有汽冇汽,問個俄嬸,佢真係冇老點我地喎!啲人話俄羅斯人木口木面不苟言笑,喂,其實一個正常人係正常狀態下係唔會笑架喎,如果你去到一個地方成條街嘅人都無啦啦對住你笑,會唔會更加詭異呀……

5.俄羅斯治安好差
去之前都聽人講話好多人搶野偷野呀,陳雅明又話佢個FD比人搶野要一個打十個,又話好多黑警會拉你埋暗角敲詐你等等,我地都有帶備防狼器諗住有事可以求救,TOUCHWOOD我地一樣都冇遇到喎!可能我地好彩啦,又或者我地個樣生得似窮人所以冇人向我地埋手啦!不過啲人話要格外提防嘅流浪漢同中亞人我地都唔多覺有喎!可能我地真係好好彩啦!不過始終去邊度旅行都要小心財物架啦,銀包PASSPORT睇實啲包冇死架啦!


係咁多喇!俄羅斯係好地方黎架!大家放心去啦!(跳起YEAH