Sunday, August 25, 2013

你真係好瘦

我統計過,一個禮拜下來,最多人同我講過既一句話,繼"Hi"、"Bye"、「唔該」呢一類打招呼或禮儀用語之後,就係「你真係好瘦」。

「你真係好瘦」「你真係好瘦」「你真係好瘦」「你真係好瘦」「你真係好瘦」「你真係好瘦」「你真係好瘦」「你真係好瘦」「你真係好瘦」「你真係好瘦」

相信好多「真係好瘦」既人都同我景況一樣。我都唔明尐人咁鍾意同我地呢尐瘦人講「你真係好瘦」係出於咩心態。係羨慕係妒忌?係同情係憐憫?係咪你同我既交情只係淺到可以以我既身型做話題?(例子︰今朝見個素未謀面既客,佢第一句同我講既野係「你好」,第二句同我講既野係「你真係好瘦」。)定係你覺得我會唔知自己好瘦所以諗住做好心話呢個客觀事實畀我知?「嘩你唔講我真係唔知呀。多謝你呀9527。」

最弔詭既係,你唔會見到有人會走去個肥婆面前兜口兜面同佢講︰「你真係好肥」,因為你知道你話人真係好肥係會預計到果個人會唔開心,但係點解你冇預計過話人真係好瘦可能都會令到佢唔開心呀?係咪瘦人既心靈會堅強尐呀?係咪瘦人因為瘦得滯所以你覺得佢打你都冇力呀?

定係你覺得話人瘦係讚緊佢呀?我又統計過,90%既瘦人其實都唔係好想自己瘦的,只係佢增唔到肥。咁即係你「讚」緊佢一尐佢自己都唔想係咁既野啦。咁即係唔係「讚」啦。同讚人靚唔同,你讚個靚女靚,唔通佢會同你講「其實我好想自己樣衰」咁呀?(well,可能真係有,不過應該唔多)

不過咁,老老實實,雖然我真係好瘦,但係其實我本身對「你真係好瘦」呢句野就冇乜hard feeling既,同你話我真係好平或者真係飛機場差不多,我都冇乜野,有時仲會沾沾自喜(!),不過我就只係覺得果尐開口埋口就話人「真係好瘦」既人其實係咪冇諗過我上面講既野,即係你話人瘦其實會唔會有人唔鍾意,我覺得好多人都冇諗過囉。所以呢,為左幫瘦人反擊,或者警惕世人,有時一有人話我「你真係好瘦」,我就會用無限委屈加幾滴咁多羨慕語氣同返佢講︰

「唉,我都唔想架,我都想好似你咁肥。」

唉,我呢尐諗野咁subtle既人就係咁,有「先天下之憂而憂」既氣概,註定一世痛苦。

Saturday, August 17, 2013

為了看電影,你可以去到幾盡?



鬼節,說個故事。

在百老匯院線看電影,開場前總會放b.wing的動畫,請觀眾關電話鈴聲那個。看到最後,那個小鬼會打翻爆谷。有一次和前男友看電影,看到小鬼打翻爆谷那一幕,他不經意地「哎唷」了一聲,望著我笑了笑。

然後自此以後,每次我在百老匯院線的電影院看到這一幕,我都彷彿聽到看到他在我耳邊「哎唷」一聲,再望著我微笑。如幽靈,如鬼魅。

不過他還在生的。