臉紅

幫我做facial果個阿姨不嬲都好proud of自己既皮膚，成日話自己嬌嫩既肌膚勝過好多18廿2云云。今日同我做做下facial，失驚無神問我︰「妳估下我幾多歲？」

1向以童言無忌聞名省港澳既我，正想答「40」 (其實我覺得答「40」已經虛偽左)，點知佢話︰「唔會係40幾卦？」

於是我唯有迫住講︰「30幾lor。」

「30頭定30尾先？」帶點輕蔑的語氣。

雖然我合埋緊對眼，但係都feel到佢猶如拍戲大光燈果種灼熱既目光，如熊熊大火，王喜都睇怕救唔熄。有鑒於我塊面仍然係佢手上，即使我討厭自己偽善，我都唯有迫自己答30頭︰

「30尾。」

立即換來嗤之以鼻既1句︰「妖！30尾咪即係4張！」

再換來既係佢突然好粗暴咁捽我塊面，彷彿企圖要撕破我偽善既面具。

呢個時候我聯想起果0的批評張廿蚊提出最低工資廿蚊唔人道但係轉個頭又提出最低工資應該係廿2廿3廿4既議員，大概佢地就好似做緊facial既我咁，要保住塊面，但係又受唔住良心既責備，所以講埋哂0的廢話。

然後就被0的社會學者ah專欄作家ah一野撕破佢地偽善既面具︰「妖！廿幾蚊咪即係廿蚊！」

就係咁。

估唔到，做1次facial，係會咁獲益良多—除左得到1塊乾淨滑溜既面，仲可以了解自己既偽善、溫習小學數學堂學既4捨5入、甚至仲開始對自己既事業前途有左明確既方向—原來我有潛質做議員之餘，facial阿姨都可以轉行做專欄作家ah下。



做完facial之後，阿姨仲要同我講︰「拿，妹妹，妳睇，我不嬲都錫哂妳塊面，我冇留力ga！」

我望著facial房裡掛牆鏡子內因為敏感而顯得緋紅的臉，我同阿姨講，係wor，妳真係冇留力wor，多哂拜。