一兜啤撚嘻哩

睇完《盲探》，我先醒起我n年前係寫緊部長篇搞笑小說，叫《請你好好放低》。個男主角係鬼，食腦；女主角係人，冇腦。故事設定呢一人一鬼嘅組合係要走去查其他鬼點死，心裡有咩牽掛，從而超渡佢地嘅亡魂。（尐亡魂嘅名我都諗定哂係好朋友嘅名。百無禁忌呀 XD）故事嘅主題係「放下」。而男女主角透過一連串呢尐case，最後都各自能放下自己心裡的鉛塊。而個男主角某程度上係盲—角色設定雖然佢係鬼，但佢係睇唔到其他鬼，所以要依靠女主角，因為得女主角有陰陽眼。拿！所以我覺得韋家輝係有少少抄我！ XD

不過當年寫左五章就冇寫了，因為覺得自己尐推理好流，要進修下推理小說寫作技巧 (話時話我覺得《盲探》尐推理都ok流 XD)。再者，想象力太貧乏，寫下去就唔夠有趣了，畢竟這是搞笑小說呀！於是我真係放低左篇小說。冇錯到頭來覺悟左「放低」果個係我。 XD

唯一放唔低嘅係，由於小說爛左尾，我淨係寫死左一個friend，對於我來不及寫死嘅，在下深表遺憾。 XD

或者有一日，當我對放下執著有更深嘅覺悟，對搞笑有更高嘅造詣，對推理有更強嘅領略，我就會由頭再寫過呢個故事。 (呼煙 )

【原創長篇連載小說】請你好好放低 1

*****

除此之外，《想你就寫信》系列我都好想pick up返。有朋友話可以同我合作，幫尐信畫插畫。佢尐畫好靚，對於呢次合作我都好期待。可惜，我仲未醞釀到寫返呢個系列既感覺。當初開始寫呢個系列，係對失戀既治療。我承認戀愛成日都帶比我好多寫作靈感。但係而家我又冇失戀，又冇暗戀，又冇苦戀，總之乜戀都冇，我冇左果種動力。但係我冇理由為左寫野而走去搞果尐「戀」架嘛，好似好本末倒置咁，所以「戀愛」既野，都係順其自然好尐。至於寫作，我相信唔只戀愛可以激發到我，我需要訓練既，係discipline。嗯。我要加油。

【想你就寫信】第13封信 原諒

熱血時報—《笑死朕》第130集—從陳振聰看創作管理，有講到，一個創作人可懷才得遇，有兩樣野需要並存—一係才華，二係discipline。