頭先有個自稱長江集團旗下金融理財公司既agent打來想約我出來傾下，吹左半個鐘水，不果，最後我同佢講︰「你老細係李嘉誠呀嘛？我唔鐘意李嘉誠，我連百佳都唔去。」佢最後終於放棄。我同佢講︰「咁你早d訓啦拜拜。」
*****
目畢全程的打令在我收線後話我︰「妳咁樣玩9人半粒鐘，妳變態架？」拿，話就笨唔係咁講喇，你都聽到我同佢講左不下數10次「其實我唔需要」，但係佢係都要死唔斷氣，咁我又費事係佢講到半路中途cut佢線咁冇品，咪同佢傾訴下囉。我地最後都係和平話別架—佢知我係街，仲叫我唔好玩咁夜添，我知佢仲未放工，我都叫佢早0的返去訓，成件事幾咁和平，幾咁友愛，仲依依不捨咁講左幾次拜拜添。你有冇諗過，其實夾硬cut人線，又何嘗唔係1種剝奪人地言論自由既暴力呀？雖然我唔妥地產霸權，但係我呢0的「和平理性」既「激進80後」係笨唔會「以暴易暴」既。
*****
打令又話我︰「問題係妳哂左人半粒鐘呀！人地本來可以做多幾個cold-call架！」拿，又冇話邊個哂邊個半粒鐘既，咁佢夠哂左我手機半粒鐘電，又哂左我半粒鐘通話分鐘啦，咁我今個月爆分鐘係咪佢幫我比丫？我都冇追究啦。你呢0的人成日自以為好心，人地講唔夠3秒就cut人線，人地開場白都未講完呀！你知唔知你對人做成幾大挫折呀！我同佢傾足半粒鐘，足以協助佢練熟0的對白，訓練佢既口才同應變能力，等佢係面對下1個客人時更有自信心，你知唔知我幾用心良苦呀！佢開頭講來講去3幅被，直到我同佢講我唔幫襯李嘉誠，佢竟然考返我轉頭問我知唔知李嘉誠旗下有咩公司呀！幾叻女呀！我幾欣賞佢呀！李嘉誠應該多謝我同佢訓練出咁優秀既員工添呀！
5 comments:
其實，你響講唔需要佢公司的服務之前，可以加多句以下的句子：
1我老豆係李嘉誠－－我係佢的私生女。
2我已經係長江集團的大股東。
3唔好玩啦，自己人來啊，我係隔離 team 的。
其實我都好懷疑， Cold Call 呢回事有幾多效率？即你請一百人返來，怒打一萬個電話，但只找到十個客，夠唔夠回本？
佢地平時俾人cut得線多，心理會有問題，難得有人俾佢地盡情洩慾，辛苦晒！
講開又講，我最憎俾人追問：「點解唔需要呢？」
謝天下︰
幹啦被你這樣一說我真的覺得自己很慈悲為懷啊！
幹啦我也很討厭「點解唔需要呢？」這1句，如果我心情好，當他問「點解唔需要呢？」，我會答他「點解唔需要？我唔話比你知等你心思思」:-)
熊貓王︰
哈我下次會試用你提供的方法啦
至於cold call夠唔夠回本這個問題，視乎很多方面啦，例如看是什麼行業啦，看打電話那個人的口才啦，看聽電話那個人易唔易落搭啦……
試過有次我聽到隔離位個同事聽左個銀行賣保險的電話，講左5分鐘佢就買左啦！同佢傾談之下知道原來佢之前都係透過cold call買左幾個唔同性質的保險……
不是親眼目睹我也不會相信，原來這些電話cold call真的會有人落搭啦！
Post a Comment